CARITA CINTA BASA SUNDA
karya saepudin k-xev
Cinta Gara Gara Facebook
Satiap jalma di alam dunya pasti geus teu
bireuk deui kanu ngaranna facebook. Facebook the diciptakeun ku akang Mark
zuckenberg, urang barat atawa urang bule. Tadina mah akang Mark the nyieun
Facebook keur komunitas di universitasna wungkul. Tapi lila kalilaan loba jalma
anu panasaran hayang ngasaan nyoba Facebookan, ahirna eta Facebook teh jadi
mashur sarta nu makena loba pisan.
Sim kuring masih inget, waktu mimiti nyobaan
Facebookan meni karasa kaluman pisan, pedah biasana mah mun hayang ngobrol teh kudu
nelpon atawa sms-an, matak beak duit ratusan. Ayena mah saprak aya Facebook,
meni asa ku bagja pisan, hayang ngobrol ka rerencangan, atawa ngan saukur
ningalian foto dulur anu jajauhan tinggal
facebookan.
Poe ieu langit caang taya nu ngahalangan, panon
poe nyorot kana embun anu masih aya dina dadaunan. Sora manuk silih patembalan milu
ngaramekeun alam dunia sarta nambah kaendahan.
Kuring nulis status di facebook : “Duuh endah
pisan…poe ieu kacida cerahna…!!”. Teu lila Oedin K-xev ngomentaran kana status
kuring “Muhun Dan … asa ku endah pisan ciptaan nu Maha Rohman, hawana enak yeuh
mun urang jalan-jalan ka pagunungan atawa pasawahan, bari papasangan, mawa bebekelan,
terus makan babarengan balakecrakan….”. Ku kuring ditembal deui : “Waduh…hanjakal
pisan kuring can boga pasangan….”. Oedin
K-Xev komentar deui : “Sabar nya… mudah-mudahan aya anu ikhlas Dan…hahaha”.
Saperti biasana kuring angkat ka sakola, bari
semangat empat lima, teu hilap hape disumputkeun dina calana, maklum bisi aya
rajia HP di sakola. Di kelas kuring ngaregepkeun sagala pelajaran anu ibu guru
terangkeun.
Teu karasa, bel mulang disada. Di tengah
jalan hape meunang kiriman tina facebook, aya anu menta konfirmasi pertemanan,
pas dibuka ngarana Rafika, fotona meuni geulis matak kabita, tapi dina hate
campur aduk dua rasa antara bungah jeung curiga. Bungahna pedah kakara ayeuna
aya mojang anu ngajak pertemanan bari teu apal saha anjeunna, curigana….kadang
aya dina facebook anu pura-pura fotona mojang padahal jajaka.
Bari teu malirekeun kana permintaan facebook
tadi, kuring neruskeun perjalanan mulang. Sajajalan loba jalma pada merhatikeun
ka kuring siga anu pinuh pertanyaan.
Abong keur ngalamun dina hiji gang leutik,
kuring teu nyadar paamprok jeung babaturan ngaranna si Sule ngaran panjangna
mah Suleiman, tapi barudak make lalandihan Sule, pajar teh ngarah gampang
ngageroannana. Si Sule nepak kana taktak kuring bari pokna : “Dan…tong ngalamun
atuh…!”. Kuring ngarasa reuwas pisan, maklum keur usum begal, bari nembal : “Saha
nu ngalamun..ari …eh dasar Sule…sugan teh saha !”. Sule nempas deui : “Eta weh
katingalina semu nu bingung kitu, keur mikiran naon atuh Dan ?”, Kuring
ngajawab bari semu era : “Muhun Le, tadi aya nu ngajak pertemanan di facebook,
jadi kapikiran wae”. “Oh kitu…” bari indit Sule ngingetan kuring supaya ati-ati
di jalan tong loba ngalamun, bahaya.
Cinta sajati ? naha aneh tiap inget kana foto
prifil eta mojang hate the dag dig dug deg-degan. Naha ieu anu disebut "Cinta Sajati" anu dipimilik ke
sakabeh jalma? Cinta anu cenah kacida endahna jeung mawa bungah kana hate.
Nepi di imah, kuring langsung muka laptop,
ngecek facebook niatna mah. Tapi karek ge muka laptop geus digeroan ku pun bapa
dititah meuli es kalapa, “Dan…bapa pangmeulikeun es kalapa heula nya? saur bapa,
“Tapi Dani menta sabungkus nya pa !” ceuk kuring rada kapaksa, bari kereteg
dina hate “Tapi kabeneran yeuh kuring ge
haus pisan mungpung gratisan”, bapa semu mesem bari pokna “Kabiasaan Dani
mah kudu aya buruhna wae, heueuh jig atuh buru meuli kaditu, bapa keur hayang
pisan es kalapa !”. kuring buru-buru meuli es kalapa pesenan pun bapa.
Beres meuli es langsung ka kamar muka laptop
nu tadi ngageroan bae. Teu basa basi kuring muka facebook, terus mukaan pesan
anu aya di facebook, aya 4 pesan anu teu acan dibaca, opatan nana ngajak
kenalan, tapi aya hiji anu matak panasaran ngan ukur ngirim pesan “Hai ?” jeung
ngajak pertemanan. Kuring langsung ningali profil na eta mojang, sihoreng anu
tadi inbox dina HP. Kuring ngabales bari nanya “Hei juga, siapa ini ya ?”.
ditungguan nepi ka satengah jam, tapi teu acan aya balesan. Bari nungguan
balesan kuring nonton film drama korea.
Teu karasa jam di kamar nunjukkeun kana angka
2, tapi tetep can meunang balesan. “Aduuh ieu beuteung kukurubukan menta
dieusian”, bari rada kesel kapaksa kuring ka dapur dahar heula sanajan teu tega
kudu ninggalkeun laptop.
Sanggeus wareg terus kuring muka laptop deui,
pas facebook dibuka, alhamdulillah aya jawaban, anu eusina “Namaku Tiara, kamu Dani kan, boleh kenalan
gak ?”. “Boleh aja” jawab kuring, terus kuring nanya deui “Emang kamu tahu FB
ku dari siapa ?”, “Aku dikasih tahu FB kamu sama Sule” jawabna singkat. Kuring rada
mikir heula “Oh Sule yang rambutnya kribo, Oke deh aku konfirm FB ya !”.
Unggal poe silih kirim pesan, kirim komen teu
poho silih kirim foto, kadang silih sindir jeung silih puji sarta kirim-kirim
lagu atawa film anu keur rame di bioskop. Teu karasa tilu minggu geus kaliwat, ayeuna arek
jejeg sabulan kuring jeung eta mojang facebookan.
Dina hiji mangsa kuring muka facebook, pas
kabeneran pisan Tiara oge keur online. Dina hate “Wah kabeneran yeuh..Tiara
keur online oge !”. Kuring langsung nyoba
ngajak ketemuan ka Tiara istilah budak ayeuna mah disebutna kopi darat. “Tiara
kapan-kapan kita kopi darat yuk ?” Ceuk kuring dina percakapan, “Ayo.., kapan,
dimana ?” jawab manehna. “Gimana kalau hari minggu aja jam 07.00, di taman
perumahan methland ?” tembal kuring bari rada deg-degan, Tiara ngajawab deui “Oke
deh, ntar aku tanya temenku, siapa tahu dia mau ikut”. Kuring oge janjian jeung
Sule poe Minggu arek kopi darat jeung Tiara, Sule langsung nyanggupan kana
pangajak kuring.
Alarem HP disada jam 05.30, nandakeun ayeuna
poe minggu, sabab kuring geus masang alarem HP bari make note “minggu ketemuan
jeung Tiara”. Kuring langsung mandi, teu
hilap ngosok gigi, make sampo lifeboy anu wangi. Beres mandi make baju trendi
meunang meuli kamari di mall cileungsi, terus disemprot minyak wangi melati.
Di taman methland kuring nungguan sule, tapi can
datang, jam tangan nunjukkeun jam 06.49, hate tambah deg-degan. Ti kajauhan aya
2 motor anu ngadeukeutan, motor anu kahiji lalaki , anu kadua aya duaan, hanas
hate geus bungah pisan bakal kenalan jeung mojang anu aya di facebookan. Sihoreng
teh geuning lain mohang anu ditungguan.
Akhirna kuring mulang teu meunang kapastian
naha jadi ketemuan atawa ngan saukur angan-angan sorangan……
Tamat
